تصميمات مودرن للمساحات الصغيرة

معظم البنات دلوقتي محتارة بين الأثاث المودرن والكلاسيك في تأسيس شقتهم؛ ده لأن المودرن معروف عنه إنه شيك وتصميماته مبهرة، وفي نفس الوقت الكلاسيك معروف عنه إنه بيعيش مدة طويلة، وتمنه فيه؛ علشان كده قررنا إننا نتكلّم عن الأثاث المودرن، وإزاي هو تطوّر في صناعته وتصميماته وبقى ينافس الأثاث الكلاسيك.

ده غير كمان إن البنت لما تختار أثاث مودرن لازم تعرف إزاي تستفيد منه ومن تصميماته في المساحات الصغيرة والكبيرة.

كل ده هنعرفه من المهندسة "مي مراد" -أستاذ بكلية الفنون الجميلة- قسم عمارة داخلية.



* هل الأثاث المودرن دلوقتي بقى ينافس الكلاسيك في المتانة والجودة؟!

من وجهة نظري إن المودرن دلوقتي هو المناسب للأثاث العصري، وبيكون فيه وظائف متعددة، والأهم من كده إنه شيك ومتطوّر وبيمتاز بالمتانة، يعني نفس مواصفات الكلاسيك، بالإضافة إنه بسيط وليس به "أويما"، وميزة الأثاث المودرن إنه مناسب جداً للشقق اللي مساحتها صغيرة أكثر من الأثاث الكلاسيكي.

* هل فيه أنواع من الأثاث المودرن معروفة ومضمونة علشان الشباب يشتريها؟!

المودرن فيه منه حاجات بتتصنع في مصر، وفيه حاجات تانية بتكون مستوردة من تركيا وماليزيا واللي مشهورين جداً بالجودة، وأهم حاجة إننا نروح لمكان له اسم كبير؛ لأن السمعة مهمة جداً، أو ممكن نستعين بنجار كويس يعمل نفس الشكل اللي موجود في الكتالوج أو نستعين بمهندس ديكور يشرح ويصمم للنجار شكل الأثاث المودرن المناسب.

* وإيه هو الأثاث النيوكلاسيك؟!

النيوكلاسيك هو الأثاث اللي بيجمع بين المودرن والكلاسيك، وبيكون بإضافة أجزاء وإكسسوارات وحليات من الأثاث الكلاسيكي على الأثاث المودرن، ونشعر به بالطابع الكلاسيكي زي الأنتريه المذهب بدلا من الصالون المذهب، لكن ميزته إنه بياخد مساحة أصغر من مساحة الأثاث الكلاسيك.